Германската Влада ќе издаде стратешки документ за Кина

Германската Влада планира денеска да го објави долгоочекуваниот документ за стратегијата во однос на Кина.

Германската министерка за надворешни работи Аналена Бербок соопшти вчера за објавувањето на документот додека беше на Самитот на НАТО во Литванија.

Текстот ќе биде објавен откако Германија ќе ја објави својата прва стратегија за национална безбедност во средината на јуни. Тој ќе ја носи пораката дека „сакаме да живееме во мир и слобода заедно со сите партнери во светот, со сите земји во светот, но во исто време не сме наивни“, рече Бербок.

Таа изјави дека лекцијата од руската инвазија на Украина е дека едностраната зависност во меѓународните односи треба да се намали. Руската инвазија ја разоткри зависноста на Германија од рускиот гас, драматично ги зголеми цените на енергијата и ја принуди германската Влада брзо да го промени курсот на својата енергетска политика.

Германската стратегија за национална безбедност на 70 страници, која е производ на неколкумесечна дискусија, ја опиша Кина како партнер, конкурент и системски ривал.

Истовремено, во владејачката коалиција во земјата има тензија во однос на пристапот кон односите со Кина. Зелената партија на Бербок се залага за построг пристап кон Пекинг отколку што претпочитаат социјалдемократите на канцеларот Шолц.

Несогласувањата околу односите со Кина неодамна дојдоа до израз откако Шолц ја истурка продажбата на делумен удел во пристаништето на контејнерскиот терминал во Хамбург на кинеска државна компанија, и покрај приговорите на Зелените.