Skip to content
„Гугл“ најави тестирање на вештачка интелигенција за одредување дали корисниците ги исполнуваат условите за возраста при користење на неговите производи.
Во блог-пост посветен на дигиталната заштита на деца, тинејџери и родители, компанијата го претстави новиот автоматизиран систем, кој ќе биде применет на повеќе платформи, вклучително и „Јутјуб“. Овој модел ќе овозможи поефикасно спроведување на постојните рестрикции за корисници под 18 години.
– Оваа година ќе започнеме со тестирање на модел базиран на машинско учење во САД, кој ќе проценува дали корисникот е под или над 18 години, со цел да овозможиме побезбедно и поприспособено искуство – изјави Џен Фицпатрик, потпретседателка на „Гугл Кор“.
Овој чекор доаѓа во време на зголемен притисок врз технолошките компании да воведат поефикасни мерки за заштита на децата. „Гугл“ најави дека со текот на времето системот ќе се прошири и во други земји. Слични функции веќе воведе „Мета“, користејќи вештачка интелигенција за откривање лажни информации за возраста.
Компаниите сè повеќе се потпираат на вештачката интелигенција за различни процеси, а контролата на возраста е најновата област каде што „Гугл“ го применува овој пристап. Оваа иницијатива доаѓа и покрај неодамнешната реорганизација на одделот „Гугл Кор“, при што беа отпуштени стотици вработени, а дел од работните места префрлени во Индија и Мексико.
