Хамас денес треба да ослободи тројца израелски заложници

Палестинската милитантна група Хамас треба да предаде тројца израелски заложници денеска во замена за палестински затвореници во последната фаза од договорот за прекин на огнот, чија цел е да се отвори патот за ставање крај на 15-месечната војна во Газа.

Охад Бен Ами и Ели Шараби, двајцата земени како заложници од Кибуц Беери за време на прекуграничниот напад предводен од Хамас на 7 октомври 2023 година, и Ор Леви, киднапиран тој ден од музичкиот фестивал Нова, ќе бидат предадени денеска, соопшти Хамас.

Во замена, Израел ќе ослободи 183 палестински затвореници, некои осудени за вмешаност во напади во кои загинаа десетици луѓе, вклучително и 18 на отслужување на доживотна казна затвор и 111 приведени во Газа за време на војната, според Хамас.

Десетици маскирани и вооружени борци на Хамас се распоредени во Деир ал Балах, во центарот на Газа, на местото на размената, каде заложниците ќе бидат предадени на Меѓународниот комитет на Црвениот крст, кој ќе ги пренесе до израелските сили во Газа.

За семејствата на заложниците кои беа држени во Газа повеќе од една година, чекањето беше ролеркостер на страв и надеж додека се приближуваа моментите на повторно обединување.

„Не можам ни да почнам да ги опишувам емоциите од возбудата, колку сме среќни што конечно е блиску да се заврши“, рече Мајкл Леви, брат на Ор Леви, кој ја загуби сопругата во нападот на 7 октомври и има тригодишен син.

„Чекаме да го гушнеме, чекајќи да го видиме Алмог (синот на Леви) како повторно го гушка татко му.“

Другите заложници, исто така, се соочуваат со сурово враќање. Двете ќерки тинејџерки на Шараби и неговата сопруга родена во Британија беа убиени во нападот на Хамас на Кибуц Беери, каде што еден од 10 жители беше убиен.

„Ги броиме минутите, секундите и само сакаме тој веќе да биде тука“, вели Астрид Дафан-ван Диен, пријателка на Шараби, „иако ќе биде многу тешко поради Лијан (сопругата на Шараби) и девојките“.

Тим од Меѓународниот комитет на Црвениот крст во Газа е на пат да ги собере израелските заложници од Хамас, изјави за Ројтерс официјален претставник вклучен во операцијата.

Размената е последна во серијата размени со кои досега се вратени 13 израелски и пет тајландски заложници киднапирани за време на нападот на Хамас и ослободени 583 палестински затвореници.

И покрај проблемите, 42-дневниот прекин на огнот и размената на заложници за затвореници, постигнати со американска поддршка и посредство на Египет и Катар, се задржа откако стапи на сила пред речиси три недели.

Но, стравувањата дека договорот може да пропадне пред сите заложници да бидат ослободени се зголемија по ненадејниот повик на американскиот претседател Доналд Трамп да се преселат Палестинците од Газа и енклавата да им биде предадена на САД и да се развие во „Ривиера на Блискиот Исток“.

Арапските држави и палестинските групи го отфрлија предлогот, за кој критичарите велат дека ќе значи етничко чистење.

Меѓутоа, израелскиот премиер Бенјамин Нетанјаху ја поздрави интервенцијата на Трамп и неговиот министер за одбрана и нареди на војската да направи планови за да им дозволи на Палестинците кои сакаат да ја напуштат Газа да го сторат тоа.

Според договорот за прекин на огнот, 33 израелски деца, жени и болни, ранети и постари мажи треба да бидат ослободени во почетната фаза во замена за речиси 2.000 палестински затвореници.

Преговорите за втората фаза започнаа оваа недела, чија цел е враќање на преостанатите заложници и договор за целосно повлекување на израелските трупи од Газа како подготовка за конечен крај на војната.

Вооружени напаѓачи предводени од Хамас го нападнаа Израел на 7 октомври 2023 година, убивајќи околу 1.200 луѓе и запленија повеќе од 250 како заложници.

Како одговор, Израел започна воздушна и копнена војна во Газа во која загинаа повеќе од 47.000 Палестинци, според здравствените власти во Газа, и опустоши голем дел од тесната енклава.