Илјадници луѓе протестираат во Пакистан откако четири деца загинаа во напад со дрон

Илјадници луѓе во северозападен Пакистан денеска блокираа автопат со поставување на ковчезите на четири деца кои загинаа во сомнителен напад со беспилотно летало.

Протестите во областа Мир Али во регионот Северен Вазиристан почнаа вчера откако беше погодена семејна куќа, изјави локалниот жител Мохамед Џамал ​​Давар.

Не е јасно кој стои зад инцидентот. Локалниот активист Захид Вазир рече дека дронот бил управуван од пакистанската војска, која веројатно по грешка сметала дека куќата е скривалиште што го користеле исламистичките милитанти.

Пакистанските разузнавачки претставници изјавија дека било пукано од дрон управуван од талибанските милитанти.

„Ќе продолжиме да бараме правда за нашите деца“, рече Вазир.

Пакистанската војска и исламистичките милитанти се борат едни против други во регионот повеќе од две децении. Повеќе од 80.000 Пакистанци, огромно мнозинство цивили, ги загубија животите.