Инфлацијата ги лади берзанските рекорди: S&P 500 и Nasdaq во пад пред продолжениот викенд во САД

Американските берзански фјучерси забележаа пад во петокот, додека инвеститорите ги анализираа најновите инфлациски податоци во пресрет на продолжениот викенд во САД.

Фјучерсите поврзани со Dow Jones Industrial Average паднаа за 102 поени или 0,4%. Фјучерсите на S&P 500 се повлекоа за 0,3%, додека оние на Nasdaq 100 се намалија за 0,4%.

Новите бројки од индексот на лична потрошувачка (PCE) – омилен показател за инфлацијата на Федералните резерви – покажаа зголемување од 0,2% на месечно ниво во јули, и 2,6% на годишно ниво. Основниот PCE (исклучувајќи храна и енергија) се зголеми за 0,3% месечно и 2,9% годишно точно во согласност со очекувањата.

Акции на Nvidia, клучен играч во вештачка интелигенција, продолжија да паѓаат, губејќи околу 1% на пазарот, откако се појави извештај дека кинескиот технолошки гигант Alibaba развил напреден чип како алтернатива, поради ограничувањата што Nvidia ги има во Кина. Акциите на Alibaba, пак, се зголемија за повеќе од 2%.

И покрај договорот што претседателот Доналд Трамп го склучи со Nvidia за повторно продавање на H20 чипови во Кина, кинеските власти ги повикаа локалните компании да ги запрат набавките, поради наводни безбедносни грижи.

Caterpillar изгуби речиси 3% откако предупреди на можен удар од 1,5 до 1,8 милијарди долари оваа година поради новите царини, а Dell Technologies падна за 5% поради слаба прогноза за тековниот квартал.

И покрај денешниот пад, берзите во четвртокот завршија во добивка – S&P 500 првпат затвори над 6.500 поени, Nasdaq Composite порасна за 0,5%, а Dow Jones се искачи за 0,2% на нов рекорд.

Надежите за одржливост на вештачката интелигенција остануваат високи, иако некои аналитичари изразуваат скепса.
„Ако некој мисли дека сме на врвот на AI-бранoт, го потценува колку брзо се шири,“ рече Том Ли од Fundstrat за CNBC.

За август, Dow бележи раст од 3,4%, S&P 500 е зголемен за 2,6%, а Nasdaq води со пораст од 2,8%.

Берзите влегуваат во продолжениот викенд со мешани сигнали: рекордни нивоа, но и зголемена внимателност поради глобалната неизвесност и инфлацијата.