Skip to content
Француската влада ги прикривала одлуките за нелегалниот третман на минерална вода од страна на мултинационалната компанија „Нестле“, вклучувајќи го и светски познатиот бренд „Периер“, соопшти истражниот комитет на францускиот Сенат.
Извештајот детално ги анализира повеќегодишните активности на „Нестле“ насочени кон спречување на бактериска или хемиска контаминација на водата што се продава под етикетите „природна минерална вода“ или „изворска вода“ за брендови како што се „Контрекс“, „Вител“ и „Хепар“. Овие третмани, според важечките француски и европски регулативи, се строго забранети.
Прикривање од страна на владата
Во извештајот се наведува дека француската влада свесно ја прикривала оваа „нелегална практика“, што е во спротивност со прописите на ЕУ кои строго забрануваат било каква дезинфекција или третман на природна минерална вода што би можел да ги измени нејзините својства.
Сенатот истакнува дека станува збор за „намерна стратегија за прикривање“, која започнала уште од првиот состанок на кабинетот посветен на ова прашање во октомври 2021 година. Неколку месеци подоцна, властите го одобриле планот на „Нестле“ за замена на забранетите третмани со постапка на микрофилтрација.
Јавно признание и казна
Минатата година, „Нестле“ јавно призна дека користела забранети третмани на минерална вода и се согласи да плати казна од два милиони евра за да избегне судска постапка.
Истражната комисија во текот на работата интервјуирала повеќе од 120 официјални лица и експерти запознаени со случајот. Единственото лице што одбило да даде исказ било Алексис Колер, тогашен генерален секретар на Елисејската палата, за кого се вели дека повеќепати се среќавал со менаџери на „Нестле“.
Комисијата заклучува дека Претседателството на Републиката било запознаено со измамата најдоцна од 2022 година и дека компанијата со години ги лажела потрошувачите.
Реакција на Макрон и обем на измамата
Запрашан за скандалот во февруари, францускиот претседател Емануел Макрон изјави дека „не е свесен за овие работи… нема договор со никого“.
Известувачот на комисијата, Александар Уизил, наведе дека француската агенција за борба против измами проценила дека вкупниот обем на измамата надминува три милијарди евра.
Тој нагласи дека природната минерална вода се продава од 100 до 400 пати поскапо од обичната вода од чешма, нарекувајќи го случајот „измама на потрошувачите“.
Скриени третмани и опасности по здравјето
Уизил опиша посета на фабрика на „Нестле“ на југот на Франција, каде што, според него, третманите се вршеле во „простории скриени зад плакари“. Во извештајот се наведува дека „Нестле“ тврди оти, доколку не им биде дозволен одреден вид третман, фабриките ќе мора да се затворат поради контаминација на изворската вода со бактерии како E. coli, што може да предизвика сериозни заболувања и дури и смрт.
