Италија воведува забрана за мобилни телефони во средните училишта

Италијанското Министерство за образование објави дека од почетокот на новата учебна година мобилните телефони ќе бидат целосно забранети за време на наставата во средните училишта. Оваа мерка, која ќе стапи на сила по летниот распуст, претставува проширување на претходната забрана која важеше само за ученици до 15-годишна возраст.

Министерот за образование Џузепе Валдитара ја соопшти уредбата, истакнувајќи дека целта е да се создаде поконцентрирана и посмирена средина за учење. Според него, прекумерната или неправилната употреба на мобилните уреди има негативни последици врз менталното здравје, благосостојбата и академскиот успех на учениците.

Сепак, предвидени се исклучоци за ученици со попречености, на кои телефонот им е неопходен како дел од наставната поддршка. Според новите правила, мобилните телефони ќе треба да се оставаат во посебно назначени прегради пред почетокот на часовите.

Оваа иницијатива е дел од поширок европски тренд, каде сè повеќе земји дискутираат или воведуваат построги ограничувања за користење на мобилни уреди во училиштата, со цел подобрување на квалитетот на наставата и намалување на дигиталната зависност кај младите.