Израел го бомбардираше Либан

Израел вчера изврши бомбардирање на Либан, при што загинаа шест лица, вклучувајќи и едно дете, објавија либанските власти. Нападот следеше по пресретнување на ракети, кои наводно биле истрелани од либанска територија кон Израел.

Хезболах, либанската проиранска групација, ја негираше одговорноста за ракетниот напад и ги обвини израелските власти за користење на инцидентот како оправдување за продолжените напади врз Либан.

Овој ракетен напад е прв ваков инцидент по постигнувањето на прекинот на огнот со Хезболах, кој беше потпишан на 27 ноември. Овој договор стави крај на војната помеѓу израелската армија и Хезболах, кој започна офанзива против Израел во знак на солидарност со палестинскиот Хамас на почетокот на конфликтот во Газа во октомври 2023 година.

Прекинот на огнот донесе релативен мир во Либан по повеќе од една година напади од Израел врз објекти поврзани со Хезболах, според израелската армија. Израел ги повлече делумно своите војници од јужен Либан на 15 февруари.

Израелската војска вчера утрото пресретна три од шест ракети истрелани од јужен Либан кон северниот регион Галилеја. Како одговор, израелскиот премиер Бенјамин Нетанјаху нареди на војската да нападне цели во Либан. Израелските напади погодија десетици ракетни фрлачи и команден центар на Хезболах во јужен Либан.

Либанското Министерство за здравство информираше дека пет лица, вклучувајќи и едно дете, загинале во нападите, а осум други се ранети во градот Тулин. Во вечерните часови, Нетанјаху и министерот за одбрана Израел Кац наредија нова серија напади на цели на Хезболах.

Либанските медиуми објавија дека израелските напади продолжиле на југот и истокот на Либан, вклучувајќи и напад врз градот Тир, каде што едно лице загина, а седум други се ранети. Началникот на Генералштабот на израелската армија, Ејал Замир, најави остар одговор на секој ракетен напад од либанска територија.