Skip to content
Израелскиот министер за одбрана Израел Кац објави дека израелските сили го ликвидирале началникот на генералштабот на бунтовничкото движење Хути во Јемен, генерал-мајор Мухамед Абдул Карим ел-Гамари.
Во објавата на социјалната мрежа X, Кац потврди дека ел-Гамари бил убиен заедно со неколку високи функционери на Хутите во израелски воздушен напад извршен во август.
Со оваа изјава, Израел првпат официјално презема одговорност за акцијата, која претходно беше спомената во денешното соопштение на Движењето Хути. Според нив, ел-Гамари загинал по серија воздушни напади насочени кон раководството на организацијата.
Иако Хутите не го обвинија директно Израел за убиството, тие потврдија дека неколку нивни високи претставници биле погодени во нападите.
Израелската операција доаѓа во момент на зголемени тензии на Блискиот Исток, при што израелските сили во последните месеци спроведуваат низа акции насочени против сојузниците на Иран во регионот, меѓу кои и Хутите во Јемен.
