Skip to content
Продажбата на оружје кај стоте најголеми светски компании значително се зголеми во 2023 година, поттикната од конфликтите во Украина и Газа, како и од глобалните тензии, покажува новиот извештај на Стокхолмскиот институт за истражување на мирот (СИПРИ).
Приходите на овие компании достигнале 632 милијарди долари, што е раст од 4,2% во споредба со претходната година. Овој пораст е особено забележлив кај помалите производители, кои побрзо се прилагодија на зголемената побарувачка за оружје предизвикана од регионалните конфликти и тензиите во Источна Азија.
Американски компании: Со речиси половина од глобалните приходи, американските компании остануваат доминантни. Иако водечките „Локхид Мартин“ и „RTX“ забележаа благ пад, помалите производители ја задржаа динамиката.
Русија и Блискиот Исток: Руската „Ростек“ ја зголеми продажбата за 49%, достигнувајќи 21,7 милијарди долари, додека блискоисточните компании забележаа раст од 18%, поттикнати од воените операции во Газа и Украина.
Европа: Растот во Европа беше најнизок, само 0,2%, поради долгите испораки на сложени оружени системи од претходно договорени проекти.
Зошто овој тренд?
СИПРИ наведува дека глобалната нестабилност, во комбинација со програми за модернизација на воените арсенали, ја зголемува побарувачката за оружје. „Големите заостанати нарачки и зголемената побарувачка сугерираат дека овој тренд ќе продолжи и во наредните години,“ се вели во извештајот.
И покрај растот, податоците за производството на оружје, особено во Русија, остануваат делумно нејасни и предмет на сомнеж, но се претпоставува дека производството е значително зголемено.
Регионални разлики
Германија: Четирите водечки компании, како „Рајнметал“ и „ТисенКруп“, забележаа раст од 7,5%, достигнувајќи 10,7 милијарди долари.
Украина: Единствената украинска компанија во Топ 100 оствари приход од 2,2 милијарди долари, со раст од 69%.
Конфликтите продолжуваат да играат клучна улога во растот на глобалната воена индустрија, што се рефлектира во сè поголемите нарачки за оружје ширум светот.
