Јужна Кореја ќе ги ограничува претседателските овластувања по нелегалното прогласување воена состојба

Претседателот на Јужнокорејскиот парламент денес предложи измена на уставот со цел ограничување на претседателските овластувања, повикувајќи на јавна поддршка за такви измени по смената на поранешниот претседател Јун Сук-јеол, кој беше разрешен поради прогласување на воена состојба.

„Сакам да предложам брза ревизија на уставот“, изјави Ву Вон-шик на прес-конференција. „По неуставното прогласување на воена состојба и импичментот на Јун, јавниот консензус за потребата од ревизија е поголем од кога било“, додаде тој.

Ву предложи одржување на национален референдум за уставните амандмани, кој би се случил заедно со претседателските избори, кои треба да се одржат во рок од два месеца откако Уставниот суд ја потврди смената на Јун во петокот.

Судот пресуди дека отповикувањето на Јун од парламентот е валидно поради неговото кратко прогласување на воена состојба на 3 декември, што предизвика најголемата политичка криза во Јужна Кореја во последните децении.

„Одлуката на Уставниот суд стави крај на националните превирања, но потенцијалот за деструктивен конфликт околу претседателската моќ сè уште постои“, изјави Ву, додавајќи дека многу Јужнокорејци сакаат промена на „империјалното претседателство“.

Според истражувањето на јавната агенција „Галуп Кореја“, кое беше спроведено минатиот месец, 54% од испитаниците ја поддржале промената на уставот во врска со претседателскиот систем на владеење, додека 30% сметаат дека тоа не е неопходно.