Крај на евтината облека – Царинските мерки на САД ги погодуваат Шеин и Тему

По бурната недела на најави и мерки, американскиот претседател Доналд Трамп донесе извршна одлука со која се укинува царинското ослободување за пратки со ниска вредност од Кина и Хонг Конг. Оваа промена, која стапува на сила од 2 мај, директно ги погодува најголемите онлајн продавници за евтина облека – Тему и Шеин – и се очекува да предизвика значителен раст на цените.

Крај за „де минимис“ – погодноста што ја користеа милиони

Досега, правилото познато како „де минимис“ им овозможуваше на пратките со вредност под 800 долари да влезат во САД без царина и без строги гранични проверки. Со оваа мерка, американските потрошувачи со години купуваа ефтина облека и додатоци од кинески платформи без дополнителни трошоци. Но, од 2 мај, тоа се менува. Новите царини изнесуваат 30 отсто или минимум 25 долари по артикал, а од 1 јуни цената скока на 50 долари.

Овие промени, според американската администрација, се дел од поширока стратегија за заштита на домашната индустрија и намалување на зависноста од кинескиот увоз.

Масовна реакција на пазарот на брза мода

Компаниите како Шеин и Тему, кои до сега доминираа со брза испорака на нискобуџетна облека, се соочуваат со сериозен предизвик. Некои веќе започнаа да го преместуваат производството или складиштата надвор од Кина – во земји како Виетнам, Бангладеш или дури во самите САД – во обид да ги избегнат новите царински давачки и да го задржат пазарното учество.

Алон Ротем, директор за стратегија во американскиот малопродажен онлајн трговец „ThredUp“, вели дека ваквата регулатива е одамна очекувана. „Со експлозијата на брзата мода, оваа промена е нешто што силно го поддржуваме бидејќи досега постоеше нефер пазарна предност“, изјави тој за Н1 Инфо.

Потрошувачите ќе ги почувствуваат последиците

Новата царинска политика, најавена на т.н. „Ден на ослободувањето“, носи сериозни последици за американските потрошувачи, кои во последните години стануваат сè позависни од евтините онлајн нарачки. Шопингот од Тему и Шеин, кои се популарни меѓу младите генерации поради модерните парчиња по пристапни цени, може да стане далеку поскап – што ќе ги натера купувачите да бараат нови, веројатно поскапи алтернативи на домашниот пазар или во други земји.

Трговска војна со геополитичка позадина

Оваа царинска ескалација не е само економска мерка, туку и продолжение на трговската војна меѓу САД и Кина, која трае повеќе од една деценија. Одлуката на Трамп е дел од поширокиот пакет на санкции и ограничувања, со цел да се ограничи економското влијание на Кина и да се стимулира домашното производство во САД.

И додека администрацијата во Вашингтон ја прикажува мерката како начин за „враќање на работните места дома“, критичарите предупредуваат дека трошокот, како и секогаш, ќе го плати обичниот граѓанин.