Skip to content
Сириските безбедносни сили уапсија високопозициониран водач на ИСИЛ во предградие на Дамаск, соопшти Министерството за внатрешни работи на Сирија. Операцијата е спроведена во соработка со меѓународната коалиција за борба против терористичката група, јавува агенцијата Анадолу.
Според соопштението на Сириската арапска новинска агенција (САНА), кое пренесува изјава од бригадниот генерал Ахмад ал-Далати, началник на внатрешната безбедност во предградијата на Дамаск, специјализирани единици по интензивен надзор извршиле координирана рација во засолниште на ИСИЛ во градот Моадамија. Во акцијата бил уапсен Таха ал-Зуби, познат и како Абу Омар Тибија, заедно со неколку негови соработници, а безбедносните сили заплениле и оружје.
„Голем удар“ за терористите
Генералот ал-Далати го опиша апсењето како „голем удар“ за терористичката група, нагласувајќи ја подготвеноста на сириските безбедносни служби да се спротивстават на секоја закана за главниот град и неговата околина. Тој предупреди дека секој што ќе се приклучи или ќе ѝ помага на ИСИЛ ќе биде кривично гонет и дека за тероризмот во Сирија нема безбедно засолниште.
Апсењето следи откако Министерството за внатрешни работи минатата недела соопшти дека разбило ќелија на ИСИЛ и во градот Дараја, исто така во близина на Дамаск, при што биле уапсени седуммина осомничени. Според соопштение на американската амбасада во Дамаск, Сирија официјално ѝ се приклучила на меѓународната коалиција против ИСИЛ, предводена од САД, на 12 ноември годинава. Коалицијата е формирана во 2014 година и спроведувала воени операции против ИСИЛ во Сирија и Ирак, но Дамаск досега не беше нејзин член.