Катастрофално невреме во САД: Најмалку седум загинати во Мисури, илјадници без струја по торнадо и силни бури

Најмалку седум лица загинаа по силните бури и најмалку едно торнадо што ја погодија американската сојузна држава Мисури, каде што властите продолжуваат да трагаат од зграда до зграда за да пронајдат повредени.

Бурите беа дел од моќен систем на невреме што предизвика огромна штета во Мисури, донесе торнада во државата Висконсин, остави стотици илјади домаќинства без електрична енергија во регионот на Големите езера и предизвика топлотен бран во Тексас.

Во петокот попладне, невремето уриваше кровови, кршеше прозорци, рушеше ѕидови од тули и корнеше дрвја и електрични столбови.

Градоначалничката на Сент Луис, Кара Спенсер, потврди дека пет лица го загубиле животот во градот, и дека биле погодени над 5.000 домови. Околу 100.000 луѓе останале без струја до петок вечерта. Таа најави прогласување на вонредна состојба, а во најпогодените делови е воведен полициски час.

Бројот на повредени сè уште не е прецизно утврден. Еврејската болница Барнс примила најмалку 20 пациенти, од кои неколку се во тешка состојба, но повеќето биле пуштени дома во текот на вечерта, соопшти портпаролката. Детската болница во Сент Луис примила 15 пациенти, од кои двајца ќе останат на болничко лекување за време на викендот.

Националната метеоролошка служба соопшти дека радарите забележале торнадо помеѓу 14:30 и 14:50 часот во петок, во Клејтон, во областа на Сент Луис.

Противпожарната служба на Сент Луис информираше дека спасила три лица откако се урнал дел од црква, при што едно лице починало.

Паднатите дрвја и оштетените семафори предизвикаа хаос во сообраќајот, а властите апелираа граѓаните да останат дома.

Торнадо погодило и округот Скот, околу 200 километри јужно од Сент Луис, при што загинале две лица, а неколку биле повредени. Уништени се повеќе домови, соопшти шерифот Дерик Витли на социјалните мрежи.

Нови предупредувања за невреме и екстремна жештина

Националната метеоролошка служба издаде предупредувања за нови бури со можни торнада, крупен град и ветрови со силина на торнадо кои би можеле да ги погодат делови од Средниот Запад на САД.

Во петок навечер издадено е предупредување за торнадо околу Мерион во државата Илиноис, но засега нема податоци за штети или повредени.

Предупредување за прашлива бура било издадено околу Чикаго, каде прашината се ширела по линија долга 160 километри — од југозападниот дел на градот до северниот дел од државата Индијана, значително намалувајќи ја видливоста.

На жителите на Кентаки, јужна Индијана, јужен Илиноис, делови од Тенеси, Мисури, Арканзас и Охајо им е упатено предупредување за опасни временски услови, со можност за град и ветрови посилни од 120 километри на час.

Во Тексас, пак, државата се соочува со силен топлотен бран. Предупредување за екстремна топлина е издадено од Сан Антонио до Остин, со температури од 35 до 40,5 степени Целзиусови. Јужните делови од источниот брег на САД — од Вирџинија до Флорида — исто така се соочуваат со температури од 32 до 37 степени.

Влажноста што се очекува за време на викендот ќе направи чувството на жештина да биде уште поинтензивно, предупреди националната метеоролошка служба.