Skip to content
Брисел ▪ Белгискиот монарх Филип ја искористи традиционалната честитка за Националниот празник (21 јули) за остар политички апел: од итен прекин на хуманитарната катастрофа во Газа до посилно европско лидерство во свет каде што „меѓународното право отворено се доведува во прашање“.
Во петминутното видео‑обраќање, кралот изрази солидарност со цивилите во палестинската енклава, нагласувајќи дека „невини луѓе гладуваат и гинат под бомби“ и дека „оваа состојба трае предолго – срам за човештвото“. Тој му се придружи на повикот на генералниот секретар на ОН Антонио Гутереш за итно запирање на кризата.
Филип ја прошири пораката и врз војната во Украина, оценувајќи дека отпорот на Украинците против руската инвазија е борба за суверенитет што го штити и европскиот поредок. „Борејќи се за својата независност, тие го штитат и нашиот суверенитет“, нагласи тој.
Монархот предупреди дека „бруталната борба за моќ“ го поткопува меѓународното право и го повика Брисел да остане „бедем на демократијата, правдата и законот“, избирајќи „соработка наместо конфронтација, отвореност наместо исклучување“.
Обраќајќи се и до белгиските политичари, кралот посебно го истакна задоцнетото формирање на регионалната влада во Брисел по изборите во јуни 2024 година. Тој оцени дека внатрешните блокади треба „решително да се надминат“ бидејќи директно влијаат врз секојдневието на граѓаните.
На крајот, Филип ги повика Белгијците да ја црпат енергијата од празникот „за да се соочат со утрешнината со самодоверба и храброст“, без да ги заборават страдањата на другите народи.
