Skip to content
Претседателката на Европската централна банка (ЕЦБ), Кристин Лагард, денеска изрази загриженост околу потезите на американскиот претседател Доналд Трамп, оценувајќи дека неговите обиди за смена на водечките луѓе на американската Федерална резерва (ФЕД) претставуваат „многу сериозна опасност“ за економската стабилност – како на САД, така и глобално.
Во интервју за француското радио Radio Classique, Лагард изјави:
„Доколку монетарната политика на САД престане да биде независна и стане под влијание на волјата на една личност, тоа би било многу загрижувачко. Последиците врз стабилноста на американската економија – а со тоа и врз глобалната економија – би биле сериозни.“
Трамп сака да ги смени Пауел и Лиса Кук
Трамп, кој веќе неколкупати јавно го нападна претседателот на ФЕД, Џером Пауел, поради одбивањето да ги намали каматните стапки, сега се обидува да го смени од функцијата. Пауел, кого Трамп некогаш го нарекуваше „господин Предоцна“, сè уште е на чело на институцијата која ја регулира монетарната политика на најголемата светска економија.
Исто така, под напад е и гувернерката Лиса Кук, која е една од седумте членови на гувернери на ФЕД. Одлуката за нејзиното разрешување моментално се разгледува на американски суд.
Лагард предупредува: Светот не смее да трпи поради политички потези
Лагард подвлече дека секоја политичка интервенција во независноста на централните банки ја подрива довербата на пазарите и ја зголемува глобалната економска неизвесност.
Таа потсети и на неодамнешната пресуда на американскиот жалбен суд, според која најголемиот дел од царините воведени од Трамп биле прогласени за незаконски, што според неа дополнително ја зголемува несигурноста на глобално ниво.
Федералните резерви имаат клучна улога во управувањето со инфлацијата, каматните стапки и економската стабилност во САД – што директно влијае на глобалните финансиски пазари. Притисоците врз ФЕД да се подреди на политичка агенда, според експертите, може да доведат до загуба на доверба во американската економија и можен финансиски шок во меѓународни рамки.
