Skip to content
Околу два часот по полноќ, на аголот меѓу булеварот Санта Моника и Вермонт авењу во Источен Холивуд, сив „нисан верса“ намерно се качил на тротоарот и удирал во луѓе кои чекале да влезат во ноќниот клуб „The Vermont Hollywood“. Според официјалните податоци на Пожарната служба на Лос Анџелес (LAFD), повредени се најмалку 30 лица, од кои седум се во критична, а шест во тешка состојба.
По ударот, возачот – претходно исфрлен од клубот по расправија – бил извлечен од возилото од масата и физички нападнат. Во хаосот се слушнале истрели; полицијата го пронајде возачот со прострелна рана и го пренесе во болница, каде што е опериран и се наоѓа под полициско обезбедување Неговиот идентитет не се соопштува, а мотивот сè уште е непознат. Полицијата трага по лицето што пукало.
Сведоци опишуваат сцена на паника: автомобилот најпрво соборил неколку лица, потоа удрил во тезга за тако и штанд за грицки, пред да се закова во паркиран камион и столб за светилка. Повеќето повредени се млади жени, дел од нив со скршеници и тешки трауми.
На местото пристигнале над сто припадници на LAFD и LAPD, кои поставиле мобилни тријажни шатори и ги распределиле жртвите во околните болници. Градоначалничката Карен Бас им изрази благодарност на службите и најави „целосна и темелна“ истрага.
Истрагата е во рана фаза, но за полицијата останува клучно прашањето дали ударот бил производ на моментален гнев или однапред испланиран напад. Властите апелираат сите сведоци – особено оние што снимале со мобилен телефон – да се јават во LAPD и да достават видеоматеријал.
