Skip to content
Судиите на Меѓународниот кривичен суд (МКС) денеска го осудија водачот на озлогласената суданска милиција Џанџавид, Али Мухамед Али Абд-ал-Рахман, на 20 години затвор за воени злосторства и злосторства против човештвото извршени пред повеќе од две децении во Дарфур.
Абд-ал-Рахман, познат и под прекарот „Али Кушејб“, беше во октомври прогласен виновен по 27 точки од обвинението, меѓу кои и наредување масовни погубувања, организирање напади врз цивили и брутално убиство на двајца притвореници со секира во периодот 2003–2004 година, најкрвавите години од суданскиот конфликт.
Тужителите минатиот месец побараа доживотна казна, опишувајќи го обвинетиот како човек кој „свесно, намерно и, според доказите, со ентузијазам и суровост“ ги извршувал злосторствата.
За време на изрекувањето на пресудата, 76-годишниот Абд-ал-Рахман стоел неподвижно и без реакција додека претседателката на судечкиот совет, судијката Џоана Корнер, ја соопштуваше казната.
Оваа пресуда претставува значајна пресвртница во долгогодишните напори на меѓународната правда да ги казни сторителите на злосторствата во Дарфур, каде што конфликтот однесе стотици илјади животи и расели милиони луѓе.
