Лоша исхрана, прекумерна тежина – Животниот век се намалил во 19 земји од Европа

Должината на животниот век на Европејците бележи стагнација, со најголемо забавување во Англија, покажува новата студија објавена во списанието Lancet Public Health. Истражувањето потврдува дека основните причинители на овој тренд се лошата исхрана, масовната физичка неактивност и зголемениот број на луѓе со прекумерна тежина.

Од 1990 до 2011 година, просечниот годишен пораст на очекуваниот животен век во Европа бил 0,23 години, но помеѓу 2011 и 2019 година овој пораст опаднал на 0,15 години. Во анализата биле опфатени 20 европски земји, каде растот на животниот век се намалил насекаде, освен во Норвешка.

Најголемо забавување на животниот век бележи Англија, а следуваат Северна Ирска, Велс и Шкотска. Студијата покажува дека ова забавување е тесно поврзано со кардиоваскуларните заболувања и ракот, што укажува на потребата за посилни превентивни мерки.

Директорката на англиските служби за јавно здравје, Сара Прајс, нагласи дека превенцијата е клучна за создавање поздраво општество и дека е потребно посилно фокусирање на факторите што доведуваат до овие заболувања. Таа посочи дека Ковид-19 има значајно влијание на стагнацијата на животниот век, но дека здравствените политики во земјите како Норвешка, Исланд и Шведска, кои покажуваат подобри резултати, вклучуваат ефективни стратегии за намалување на смртноста од срцеви заболувања и рак.

Студијата заклучува дека за борба против дебелината и поттикнување на физичката активност потребни се посилни и подолгорочни владини политики. Потребно е ангажирање на прехранбената индустрија за создавање на поздрави производи, како и воведување на мерки кои ќе помогнат во намалување на смртноста кај помладите луѓе.