Skip to content
Поранешниот републикански сенатор од Флорида, Марко Рубио во вторникот положи заклетва откако Сенатот едногласно го потврди како нов американски државен секретар еден ден претходно.
Тој беше првиот од кабинетот на Трамп потврден од Сенатот, рече потпретседателот Џеј Д. Венс. Рубио на неговото сослушување за потврда минатата недела рече дека претседателот Доналд Трамп имал мандат од гласачите да промовира мир и ред во странство, истовремено обновувајќи ја безбедноста дома. Исполнувањето на тој мандат ќе биде неговиот единствен фокус како државен секретар, рече Рубио.
Потпретседателот Џ.Д.Венс денес го претстави Рубио како еден од неговите омилени луѓе во Вашингтон.
„Рубио ги разбира надворешнополитичките приоритети на Трамп и ќе им помогне на САД да се оддалечат од генерацијата неуспешни идеи“, рече Венс.
Рубио им рече на присутните дека приоритет на Стејт департментот на САД под негово водство ќе бидат Соединетите Американски Држави.
„Ако политиките не би ја направиле Америка побезбедна, посилна или попросперитетна, тогаш Стејт департментот нема да ги донесе тие политики“, рече тој.
Кога зборуваше на сослушувањето за потврда, Рубио наведе некои од најголемите предизвици со кои се соочуваат САД на меѓународно ниво. Тие ги вклучуваа злобните акции на кинеската комунистичка партија, руската и иранската влада и нарко картелите во Мексико.
Во врска со војната во Украина, Рубио истакна дека официјална политика на САД за време на претседателот Доналд Трамп ќе биде завршување на војната.
„Официјалната политика на САД ќе биде дека војната мора да заврши и дека ќе направиме се што е можно за да го постигнеме тоа“, изјави Рубио за телевизијата Ен-Би-Си пред церемонијата на полагање заклетва во Белата куќа.
Рубио рече дека ќе биде „комплицирано…бидејќи секоја страна ќе мора да се откаже од нешто“.
