„Марш за ангелите“ во Кран-Монтана

Стотици ожалостени маршираа во Кран-Монтана во неделата за да им оддадат почит на жртвите од пожарот на новогодишната ноќ во бар во швајцарскиот алпски скијачки центар, во кој загинаа 40 лица, а десетици беа тешко повредени.

Во капелата Сен Кристоф се одржа миса што траеше еден час во чест на жртвите од пожарот, а за време на службата беше прочитана порака со сочувство испратена од папата Лав XIV.

„Папата ни се придружува во нашата тага преку трогателни зборови и желби да го изрази своето сочувство и грижа за семејствата и да ги поддржи оние што страдаат“, рече епископот од Сион, Жан-Мари Лави.

Во меѓувреме, надвор стотици луѓе се собраа во тишина за да им оддадат почит на жртвите од пожарот.

По едночасовната миса, учесниците, со свечени лица и црвени очи, ја напуштија капелата во тишина со звукот на оргулите. Неколку стотици луѓе, некои носејќи букети цвеќе, одеа во долга поворка минувајќи покрај затворените продавници. На планината со поглед на градот, снежни топови прскаа облаци од снег.

За време на мисата, отец Жил Кавин зборуваше за „страшната неизвесност“ со која се соочуваат семејствата кои не знаат дали нивните најблиски се мртви или повредени. „Се молиме за нивните пријатели, толку длабоко погодени од трагедијата на она што требаше да биде ден на прослава и заедништво“, рече тој.

Внатре во преполната црква, ожалостена жена внимателно слушаше, со стиснати раце, повремено допирајќи ја својата бројаница, додека се читаа на германски, француски и италијански јазик.

Идентификувани 24 жртви

Кантоналната полиција на Вале објави во недела наутро дека се идентификувани 16 нови жртви од пожарот на новогодишната ноќ во ноќниот клуб „Le Constellation“ во Кранс-Монтана, со што бројот на идентификувани мртви се искачи на 24 од вкупно 40. Бројот на потврдени повредени изнесува 121.

Полицијата соопшти дека повеќето од жртвите биле на возраст меѓу 13 и 25 години.

Процесот на идентификација се потпирал на одлучувачки ДНК тестови спроведени во болницата во Лозана, споредувајќи ги генетските податоци на родителите со оние на остатоците што беа пронајдени.

Властите веќе ги вратија идентификуваните тела на нивните семејства, додека потрагата по уште тројца Италијанци кои сè уште се водат како исчезнати продолжува.

Менаџерите на барот се под кривична истрага

Швајцарските власти отворија кривична истрага против менаџерите барот каде што се случи трагедијата.

Две лица се осомничени за убиство од небрежност, намерно телесно повредување и палење, изјави регионалната обвинителка од Вале, Беатрис Пилу, за медиумите во саботата. Во соопштението за истрагата не се открива идентитетот на менаџерите.

Истражителите во петокот изјавија дека веруваат пироттехничките средства поставени на шишиња шампањ можеби го предизвикале пожарот откако се приближиле премногу блиску до таванот на преполниот бар.

Властите планираат да проверат дали изолацијата на таванот е во согласност со прописите и дали употребата на приотехника била овластена на местото на настанот. Тие, исто така, ќе испитаат и други безбедносни мерки, вклучително и присуство на противпожарни апарати и излези за итни случаи.

Швајцарскиот претседател Ги Пармелин прогласи национален ден на жалост во чест на жртвите на 9 јануари. Во 14 часот тој ден, црковните ѕвона ќе бијат низ цела Швајцарија за минута молчење, давајќи им на населението момент на колективно сеќавање во чест на жртвите.

Француската министерка за здравство Стефани Рист изјави дека 17 пациенти се лекувани во Франција, од вкупно 35 префрлени од Швајцарија во пет европски земји. Планирани се понатамошни трансфери во Германија, Италија и Белгија.