Маск најави тужби за медиуми кои известувале за експлозијата на „Тесла“

Извршниот директор на „Тесла“, Илон Маск, најави дека ќе размисли за поднесување тужби против медиумите поради известувањето за експлозијата на „сајбертракот“, што се случи пред хотелот „Трамп“ во Лас Вегас на Нова година.

Конзервативниот активист Роби Старбак сподели статија од „Business Insider“ на платформата „X“, каде инцидентот беше опишан како „експлозија на сајбертрак“. Тој тврди дека ваквите наслови го извртуваат приказот и го оштетуваат брендот „Тесла“, создавајќи погрешен впечаток дека возилото е небезбедно.

„Маск треба да ги тужи медиумите за вакви дезинформации. Овие наслови го саботираат брендот на ‘Тесла’, бидејќи сугерираат дека сајбертракот се самозапалил. Реалноста е дека кај ‘Тесла’ има пожар на секои 130 милиони извозени милји, наспроти конвенционалните возила, кај кои ова се случува на секои 18 милиони милји“, напиша Старбак.

Маск одговори со коментар: „Можеби е време да го направиме тоа“, укажувајќи дека размислува за правни мерки.

Инцидентот се случи кога возило наполнето со канистри со гориво експлодираше, предизвикувајќи смрт на возачот и повреди кај седум лица. Полициските претставници потврдија дека возачот, активен припадник на специјалните сили на САД, непосредно пред експлозијата се застрелал во главата.

Шерифот на полицијата во Лас Вегас, Кевин Мекмахил, изјави дека уникатниот дизајн на „сајбертракот“ придонел за минимизирање на штетите. „Фактот што ова беше сајбертрак го ограничи влијанието на експлозијата, бидејќи таа главно се насочи нагоре“, рече Мекмахил.

Маск го сподели видеото од изјавата на шерифот со коментар: „Злобни идиоти избраа погрешно возило за терористички напад. Сајбертракот ја апсорбираше експлозијата и ја насочи нагоре, па дури ни стаклените врати на хотелот не беа скршени“.

Маск, кој е блиска фигура со новоизбраниот американски претседател Доналд Трамп, во серија објави на платформата „X“ ги критикуваше медиумите за неточни наслови, нагласувајќи ја безбедноста на „сајбертракот“ и статистичките податоци кои ја покажуваат неговата супериорност во однос на традиционалните возила.