Skip to content
Мексиканската претседателка Клаудија Шеинбаум во саботата нареди воведување контрацарини како одговор на одлуката на САД да наметне 25% царина на целата стока што доаѓа од Мексико.
Во објава на платформата X, Шеинбаум нагласи дека нејзината влада барала дијалог, а не конфликт со северниот сосед, но дека Мексико е принудено да одговори со иста мерка.
„Му наложив на мојот министер за економија да го спроведе планот Б, на кој работевме, а кој вклучува царински и нецарински мерки за заштита на интересите на Мексико“, изјави Шеинбаум, без да прецизира на кои американски производи ќе се однесуваат новите царини.
Односите меѓу САД и Мексико под притисок
САД се најважниот трговски партнер на Мексико, додека Мексико во 2023 година ја надмина Кина и стана главен извозен пазар за американските производи.
Според извори блиски до мексиканската влада, Мексико подготвуваше можни повратни царини во распон од 5% до 20% на производи како свинско месо, сирење, свежи земјоделски производи, како и на челик и алуминиум од САД. Автомобилската индустрија засега ќе биде изземена од овие мерки.
Извозот на САД во Мексико во 2023 година надмина 322 милијарди долари, додека мексиканскиот извоз во САД достигна повеќе од 475 милијарди долари.
Шеинбаум во објавата ги отфрли како „клевета“ тврдењата на Белата куќа дека мексиканската влада е во сојуз со нарко-картелите – навод што администрацијата на Доналд Трамп го искористи како објаснување за воведувањето на царините.
Трамп изјави дека причината за новите царини е, меѓу другото, неуспехот на Мексико да го спречи влезот на фентанил во САД, како и неконтролираната миграција.
Канада возвраќа со сопствени царини
Канадскиот премиер Џастин Трудо во саботата најави дека Канада ќе воведе 25% царина на американски производи во вредност од 155 милијарди канадски долари (106,5 милијарди американски долари) како одговор на мерките на САД.
Царините на 30 милијарди канадски долари ќе стапат на сила во вторник, додека за останатите 125 милијарди ќе бидат воведени во рок од 21 ден, соопшти Трудо на прес-конференција.
Американскиот претседател Доналд Трамп претходно потпиша извршна наредба со која се воведуваат 25% царина на сите производи од Канада и Мексико почнувајќи од вторник, со исклучок на канадските енергетски производи, кои ќе бидат подложни на царина од 10%.
Трудо предупреди дека овие царини ќе му наштетат на САД, кој е долгогодишен сојузник на Канада. Тој ги повика Канаѓаните да купуваат домашни производи и да го поминуваат одморот во својата земја, наместо во САД.
Дополнително, Канада размислува за воведување нецарински мерки поврзани со клучни минерали, снабдување со енергија и други партнерства.
Со оваа одлука, Трамп ги таргетира трите најголеми трговски партнери на САД – Канада, Мексико и Кина – кои заедно сочинуваат над 40% од вкупниот увоз на американскиот пазар.
