Skip to content
Поранешната германска канцеларка Ангела Меркел беше меѓу специјалните гости кои од галеријата на Бундестагот го следеа гласањето за избор на Фридрих Мерц за нов канцелар, јавува агенцијата ДПА.
Меркел и Мерц, и двајцата истакнати членови на Христијанско-демократската унија (CDU), имаат сложена историја. Откако Меркел го презеде раководството на партијата во 2002 година, Мерц постепено се повлече од активната политика и се посвети на кариера во корпоративното право. По заминувањето на Меркел од функцијата канцелар во 2021 година, тој се врати на политичката сцена.
Во февруари, по победата на Мерц на парламентарните избори, Меркел му упати честитка и му посака „среќа“ во новата улога, потсетува ДПА.
На денешната седница, облечена во бледо жолто сако, Меркел кратко стана, се насмевна и им мавна на пратениците кога претседателката на Бундестагот, Јулија Клекнер, ја поздрави од говорницата.
Поранешната канцеларка седеше покрај Рита Зусмут, поранешна претседателка на Бундестагот (1988–1998). Меѓу другите присутни гости беа и претседателката на Горниот дом Анке Релингер, како и комесарката за вооружени сили на германскиот парламент, Ева Хегл.
Лидерот на германските конзервативци, Мерц, не успеа да добие доволно гласови за да биде избран за канцелар во првиот круг на гласање во Бундестагот, иако неговата коалиција со левицентристичките Социјалдемократи формално беше договорена. Како што јави Ројтерс, овој неуспех претставува изненадување и отежнување на процесот на формирање влада.
На Мерц, 69-годишен лидер на ЦДУ/ЦСУ, му беа потребни 316 гласови во долниот дом на парламентот, но доби само 310, соопшти претседателката на Бундестагот Јулија Клекнер.
