Skip to content
Едгар Мекгрегор, 24-годишен метеоролог од Алтадина, Калифорнија, стана херој откако на време ги предупреди соседите за разорните пожари што го зафатија Лос Анџелес. Благодарение на неговите апели, многумина успеале да се евакуираат пред огнот да се прошири.
На 7 јануари, Мекгрегор сподели предупредувања за пожарите на локалната Фејсбук страница, истакнувајќи знаци како долготрајната суша и промените во времето кои укажувале на потенцијална катастрофа. Неговиот дом чудесно останал недопрен, иако огнот уништил илјадници куќи во неговото соседство и Пасадена.
Во интервју за „People,“ тој објасни дека уште на 30 декември забележал дека условите се слични на оние кои доведоа до катастрофалните пожари на Хаваи.
Реков на луѓето: ако избие пожар, илјадници домови ќе бидат уништени. За жал, моите предупредувања се покажаа точни, – изјави Мекгрегор.
Пожарите уништија над 7.000 објекти, однесоа 16 животи и предизвикаа штета од милијарди долари. Посебно беше погоден крајот Пацифик Пелисејдс, каде познати личности како Мајлс Телер и Парис Хилтон ги загубија своите домови.
Соседите на Мекгрегор му се заблагодарија преку коментари на Фејсбук, истакнувајќи дека неговите предупредувања им спасиле животи.
Вашите совети ни овозможија да се подготвиме на време. Вие сте вистински херој, – напиша еден од нив.
Иако моменталните услови не покажуваат зголемен ризик, Мекгрегор предупредува дека без дожд, региони како Холивуд и Санта Барбара можат да се соочат со нови катастрофи.
Ова сè уште не е завршено, – предупредува тој, продолжувајќи да ги следи временските услови и да го информира населението.
