Skip to content
Министерството за здравство во Појасот Газа соопшти дека бројот на загинати во конфликтот меѓу Израел и Хамас ја надминал бројката од 55.000 луѓе, додека над 127.000 се ранети од почетокот на војната во октомври. Повеќе од половина од жртвите се жени и деца, посочува Министерството, кое не прави разлика меѓу цивили и борци.
Израел тврди дека таргетира само милитанти и ја обвинува Хамас дека делува од населени области, користејќи цивили како „жив штит“. Сепак, меѓународната заедница изразува сериозна загриженост за обемот на цивилните жртви и разурнувањето на урбаните средини.
Според податоците, околу 90 проценти од населението на Газа е раселено, додека половина од територијата е претворена во воена тампон-зона. Израелските воздушни и копнени операции уништија големи делови од инфраструктурата, при што многу жртви остануваат под урнатини или во подрачја кои се недостапни за спасувачки и медицински тимови.
Иако Израел под меѓународен притисок дозволи ограничен увоз на хуманитарна помош, дистрибуцијата останува речиси невозможна поради постојаните воени дејствија. Трагичен инцидент се случи кога десетици луѓе беа убиени од израелска артилерија додека чекале во ред за храна што ја дистрибуираше Хуманитарната фондација Газа, која е поддржана од Тел Авив и Вашингтон. Организацијата беше обвинета од страна на ОН и други хуманитарни групи за пристрасност во доставата на помошта.
Израелските власти, пак, го обвинуваат Хамас за пренасочување на помошта кон своите борци, иако Обединетите нации не утврдиле докази за такво систематско дејствување.
Според израелските воени извори, Хамас претрпел значителни загуби, а Израел тврди дека убил повеќе од 20.000 милитанти, иако тие бројки не се независно потврдени. Сè уште 55 заложници се во рацете на милитантите, од кои се верува дека помалку од половината се живи.
Конфликтот ескалираше на 7 октомври, кога милитантите на Хамас извршија масовен напад врз јужен Израел, убивајќи околу 1.200 луѓе и заробувајќи 251 лице. Подоцна, повеќе од половина од заложниците беа ослободени како дел од прекини на огнот и други договори.
Меѓународните организации ја опишуваат израелската офанзива како една од најсмртоносните и најдеструктивните воени акции по Втората светска војна. Големи делови од Газа се во урнатини, стотици илјади живеат во импровизирани кампови и училишта, а здравствениот систем е целосно колабиран.
