Намален кредитен рејтинг на САД – берзите во Азија паѓаат

Азиско-пацифичките берзи забележаа пад во понеделникот, додека инвеститорите ги анализираа најновите економски показатели од Кина и одлуката на агенцијата „Мудис“ (Moody’s) да го намали суверениот кредитен рејтинг на САД.

Хонгконшкиот индекс Hang Seng се намали за 0,73 %, додека кинескиот CSI 300 изгуби 0,48 % од својата вредност.

Во Јапонија, Nikkei 225 ослабе за 0,54 %, а индексот Topix се намали за 0,36 %. Јужнокорејскиот Kospi падна за 0,47 %, додека Kosdaq, кој ги следи компаниите со помала пазарна капитализација, забележа пад од 0,77 %.

Австралискиот S&P/ASX 200 индекс се намали за 0,15 %, додека пазарот го очекува исходот од дводневниот состанок на Резервната банка на Австралија, кој започнува денес.

Под притисок и кредитниот рејтинг на САД

Во петокот, агенцијата „Мудис“ го намали кредитниот рејтинг на САД од Aaa на Aa1, наведувајќи неколку клучни причини:

-растечки буџетски дефицит

-сè поголеми трошоци за рефинансирање на долгот во услови на високи каматни стапки

Со оваа одлука, „Мудис“ се приклучи на агенциите S&P (која го намали рејтингот на САД уште во 2011 година) и Fitch (која тоа го стори во 2023).

Стручњаци, како Васу Менон од банката OCBC, велат дека оваа промена веројатно нема да предизвика паника на американскиот пазар, но дополнително ја засилува загриженоста околу фискалната стабилност на САД, пренесува CNBC.