НАТО-сојузниците се обврзаа да издвојуваат 5 % од БДП за одбрана до 2035 година

ХАГ – Земјите членки на НАТО на денешниот самит во Хаг едногласно усвоија декларација со која се обврзуваат до 2035 година да издвојуваат по најмалку пет проценти од нивниот бруто-домашен производ за одбранбени и безбедносни потреби. Документот ја истакнува неопходноста од засилени инвестиции во услови на „сериозни безбедносни закани“ – пред сè долгорочната закана од Русија и постојниот ризик од тероризам.

Од вкупниот износ, најмалку 3,5 % ќе одат директно за одбранбени расходи во рамките на Алијансата, вклучително и исполнување на Целите за способностите на НАТО. Преостанатите 1,5 % ќе се насочат кон зајакнување на критичната инфраструктура, граѓанската отпорност и одбранбената индустриска база, како и во развој на иновации.

Секоја земја ќе изработи годишен план со „кредибилен, постепен пат“ кон остварување на оваа цел; напредокот и рамнотежата во трошењето ќе се преиспитаат во 2029 година. Лидерите исто така најавија проширување на трансатлантската индустриска соработка и укинување на трговските бариери во одбранбениот сектор, со цел брза интеграција на нови технологии и поголема колективна безбедност.

Декларацијата ја потврдува и „трајната суверена обврска“ за поддршка на Украина, при што во пресметките за одбранбените трошоци на сојузниците ќе се вклучува и директниот придонес за украинската одбрана и нејзината индустриска база. НАТО останува „обединет и непоколеблив“ во одбраната на своите една милијарда граѓани, се потенцира во текстот.

Следниот самит на Алијансата ќе се одржи во Турција во 2026 година, а по него ќе следи средба на врвот во Албанија.