Недостиг и поскапување на еден од најважните зачини во светот

Глобалниот пазар за зачини се соочува со сериозна криза – црниот пипер, еден од најчесто користените зачини во светот, би можел да стане скапоцен и тешко достапен. Американскиот увозник „Majestic Spice“ предупредува на драматичен пад на залихите, додека побарувачката останува стабилна – состојба што неизбежно води кон поскапување.

Главните извозници на црн пипер – Индија, Виетнам, Шри Ланка и Индонезија – се соочуваат со непредвидливи временски услови. Обилните дождови, проследени со продолжени суши, ги оштетуваат жетвите и го забавуваат снабдувањето, со што се создава притисок врз глобалната дистрибуција.

Климатските промени влијаат и на квалитетот на зачинот. Дел од приносите ја губат типичната арома, што ги прави неупотребливи за гастрономска употреба, предупредува „India Tribune“. Дополнителен предизвик се зголемените трошоци за трговија и нестабилните пазарни услови.

Земјоделците се откажуваат

Сѐ повеќе производители се откажуваат од одгледување црн пипер, префрлајќи се на поконкурентни и постабилни култури. Со оглед дека само четири земји произведуваат околу 80% од глобалната понуда, секоја нарушена жетва има директни последици врз светскиот пазар.

Во САД, синџири како Trader Joe’s и Aldi веќе пријавуваат ограничени количини и зголемени цени на зачините. Според Allrecipes.com, ценовниот удар најверојатно ќе ги погоди сите брендови, без разлика на квалитет или пакување.

Иако постојат алтернативи – како чадена пиперка, ким или коријандер – кулинарските експерти нагласуваат дека ништо не може вистински да го замени свежо млениот црн пипер. Препораката е јасна: набавете мелница и залиха од зрна додека цените сè уште се прифатливи.