Нигерија станува земја партнер на БРИКС

Нигерија е новата „земја-партнер“ на групата економии во развој БРИКС, објавија бразилските власти, кои претседаваат со групата во моментов.

Со тоа, афиканската земја станува деветта земја партнер на БРИКС покрај Белорусија, Боливија, Куба, Казахстан, Малезија, Тајланд, Уганда и Узбекистан.

„Со шестото по големина население во светот и најголемото во Африка, како и со една од најголемите економии на континентот, Нигерија споделува слични интереси со другите членки на БРИКС“, се вели во соопштението на бразилската влада.

БИРКС е група формирана од Бразил, Русија, Индија и Кина во 2009 година како противтежа на Групата седум водечки индустријализирани земји, а Јужна Африка беше додадена во 2010 година.

Минатата година се придружија и Иран, Египет, Етиопија и Обединетите Арапски Емирати.

Покана за членство има Саудиска Арабија, а апликации поднеле Турција, Азербејџан и Малезија.

Новоизбраниот американски претседател Доналд Трамп минатата година се закани со 100 отсто царини против БРИКС доколку тие го поткопаат американскиот долар, бидејќи лидерите на блокот се за воведување алтернативен систем за плаќање што нема да зависи од доларот.