Норвешка заплени брод со руски екипаж за кој се сомневаат дека оштетил кабли во Балтичко Море

Норвешката полиција заплени брод со руски екипаж под сомнение дека е вмешан во предизвикување „сериозна штета“ на кабел во Балтичкото Море меѓу Латвија и Шведска.

Полицијата во северна Норвешка го лоцираше бродот „Сребрена Данија“ во четвртокот вечерта, по барање на латвиските власти, и тој беше донесен во пристаништето Тромсо во петокот наутро, се вели во полициското соопштение.

„Постои сомнеж дека бродот е вмешан во сериозно оштетување на кабел во Балтичкото Море меѓу Латвија и Шведска. Полицијата спроведува операција на бродот за пребарување, разговори и обезбедување докази“, се вели во соопштението.

Бродот Сребрена Данија е регистриран во норвешка и е во норвешка сопственост, соопшти полицијата, но екипажот во бродот е руски.

Бродот пловел меѓу Санкт Петербург и Мурманск во Русија, соопшти полицијата.

Сопствениците на Сребрена Данија, бродската групација Silver Sea, изјавија за CNN дека не биле вклучени во оштетувањето на кабелот.

„Истрагата се одвива денеска и имавме добра соработка со властите“, изјави Тормод Фосмарк, извршен директор на компанијата, за Си-Ен-Ен.

Тој додаде дека властите сè уште не пронашле врски што го поврзуваат бродот со оштетениот кабел, а на екипажот му е дозволено да го подготви „Сребрена Данија“ за испловување во петок навечер.

Инцидентот го означува вториот брод што е задржан под сомнение дека извршил саботажа минатата недела, откако шведското Јавно обвинителство во неделата потврди дека се качило на брод по сомневањата за оштетување на комуникацискиот кабел што минува меѓу Шведска и Латвија.

Латвија соопшти дека штетата најверојатно била предизвикана од надворешни сили.

Овој настан беше последен во низата инциденти од крајот на 2022 година, при што беше предизвикана штета на европската инфраструктура што се протега по дното на Балтичкото Море – цевки што носат природен гас и кабли што пренесуваат електрична енергија и податоци.

Ваквите инциденти зачестија во изминатите неколку години, предизвикувајќи сомневања дека се резултат на саботажа и предизвикувајќи серија истраги од страна на европските функционери – при што некои отворено покажуваат со прст кон Москва.

Русија ги отфрли обвинувањата за вмешаност во саботажа со подводни кабли. Руската амбасада во Лондон минатата недела соопшти дека НАТО гради поморски и воздушни сили под „фиктивен изговор за руска закана“.