Нова руска провокација над Балтикот, германските „еурофајтери“ веднаш полетаа

Нова руска провокација над Балтикот, германските „еурофајтери“ веднаш полетаа, a НАТО повторно е во состојба на висока готовност. Авион е забележан над Балтичкото Море – без план за лет и радио контакт. Германските авиони „Еурофајтер“ полетаа и идентификуваа руски авион, објави германскиот портал „Т-онлајн“.

Првично неидентификуваниот авион летал во меѓународен воздушен простор без план за лет и без радио контакт, соопштија воздухопловните сили. Два борбени авиони полетаа од воздухопловната база Росток-Лаге.

Се покажа дека авионот е руски извидувачки авион Ил-20М, кој беше визуелно идентификуван, според воздухопловните сили.

Ситуацијата во регионот на Балтичкото Море неодамна стана уште потензична поради повредите на воздушниот простор од страна на Русија. Бундесверот држи дополнителни авиони во готовност за да го заштити воздушниот простор, вклучително и на источниот дел од алијансата.

Инцидентот се случи откако Русија го наруши воздушниот простор на Полска, Романија и Естонија минатата недела. Кремљ, сепак, ги отфрла обвинувањата.