Нови правила против пушење во ЕУ – Цигарите убиваат 700.000 луѓе годишно

Европската Унија (ЕУ) продолжува да се бори со последиците од пушењето, што годишно убива околу 700.000 луѓе. На почетокот на декември, министри за здравство на ЕУ предложија нови правила за забрана на пушењето на јавни простори, особено оние каде се собираат деца и други ранливи групи, како што се игралишта, забавни паркови и јавни базени. Идејата беше поддржана од сите земји-членки освен Германија и Грција, кои беа воздржани.

Целта на новите прописи е да се намали смртноста од рак, бидејќи пушењето е една од водечките причини за појава на рак во Европа. Според новиот европски комесар за здравство, Оливер Вархеи, употребата на тутун претставува „најголемиот ризик по здравјето што може да се избегне во ЕУ“.

Покрај традиционалните цигари, на сцената се појавуваат и нови тутунски производи како електронските цигари и уредите за греење на тутунот, кои се популарни меѓу младите. Европската комисија, како дел од својата стратегија за намалување на употребата на тутун, има за цел до 2040 година да создаде „генерација без тутун“, каде што помалку од 5% од населението ќе користи тутун.

Иако употребата на тутун е намалена во последните децении, податоците од Евробарометар покажуваат дека 24% од населението на ЕУ сè уште пуши, а највисоки стапки на пушење се забележуваат во Бугарија, Грција и Хрватска. За спречување на нови случаи на зависност и одложување на пушењето, Европската Унија обезбедува значителни средства за поддршка на земјите-членки во спроведувањето на мерките.

Проценките покажуваат дека 1,3 милиони непушачи умираат од пасивно пушење, што ја нагласува важноста на овие нови препораки и законски промени.