Новите царини на ЕУ тежок удар за евтината кинеска стока

Европската унија се подготвува за една од најзначајните трговски промени во последните години – воведување царини за мали пакети со кои на европскиот пазар секојдневно пристигнуваат милиони евтини производи од Кина. Одлуката, донесена на состанокот на министрите за финансии во Брисел, најавува ново поглавје во борбата против неконтролираниот увоз, а најпогодени ќе бидат популарните платформи Shein и Temu, кои станаа симбол на ултраевтината онлајн трговија.

Според договореното, царините би можеле да стапат во сила веќе почетокот на 2026 година. Тоа значи почеток на преговори со Европскиот парламент, кој треба да ја потврди мерката, но и крај на досегашната пракса производи до 150 евра да влегуваат во ЕУ без никаква царина. Еврокомесарот за трговија Марош Шефчович веќе предложи укинување на т.н. „de minimis“ изземање во првиот квартал на 2026 година – две години пред првично планираниот рок – и негово заменување со поедноставена, но задолжителна царина.

Причината за ваквата офанзива е јасна: европските компании веќе одамна предупредуваат дека не можат да се натпреваруваат со кинеските производи што пристигнуваат директно до потрошувачите, по правило по цени пониски од оние на локалните продавници. Само минатата година бројот на мали пакети што пристигнале во ЕУ се удвоил и достигнал огромни 4,6 милијарди пратки, од кои над 90 проценти дошле од Кина.

ЕУ не е единствената што реагира. САД веќе ја укинаа својата политика за „de minimis“ на пратки под 800 долари, со што се зголеми ризикот дека кинеските производи, избегнувајќи царини во Америка, уште побрзо ќе го преплават европскиот пазар. Брисел затоа се соочува со притисок: ако не реагира сега, европските производители би можеле да се најдат во уште потешка позиција.

За милиони европски купувачи кои редовно купуваат преку Temu и Shein, новите правила може да значат поскапување и подолги рокови на испорака. За европската индустрија, пак, ова е обид да се воспостави рамноправност во трговијата и да се стави крај на моделот во кој најевтината цена секогаш победува.

Она што е сигурно е дека оваа мерка претставува сериозен заокрет: Европа испраќа јасен сигнал дека е подготвена да се брани од економскиот притисок на кинескиот увоз. А дали ова ќе го промени пазарот од корен — се чини дека одговорот ќе го добиеме многу брзо.

Извор: Index.hr