Обама со први критики кон Трамп во новиот мандат: Укинувањето на средствата за Харвард е незаконско

Во својот прв јавен коментар насочен кон администрацијата на Доналд Трамп по инаугурацијата, поранешниот американски претседател Барак Обама ја поздрави одлуката на Харвард да не подлегне на барањата на Белата куќа, и покрај заканите со замрзнување на над 2 милијарди долари федерално финансирање.

Причината за притисокот е одбивањето на Харвард да направи измени во политиките за вработување, прием и настава – барања кои администрацијата ги оправдуваше со наводна борба против антисемитизам. Обама го нарече овој потег на Трамп „незаконски и брутален“ и порача дека образовните институции не смеат да дозволат власта да им ја одземе академската слобода.

Обама, кој дипломирал право на Харвард во 1991 година, порача дека универзитетот дал пример за тоа како треба да се одговори на политички притисоци, особено кога тие ја загрозуваат основната мисија на високото образование – промовирање на слободна мисла, отворена дебата и меѓусебна почит. Неговата поддршка доаѓа во време кога универзитетите во САД се соочуваат со сериозни финансиски удари од владата, вклучително и запирање на средства за научни истражувања. Администрацијата на Трамп ги поврзува овие мерки со потребата од заштита на еврејските студенти по протестите поврзани со војната во Газа и американската поддршка за Израел.

Реакцијата на Харвард предизвика широк бран на поддршка. Стотици професори од Јејл потпишаа писмо во кое го поддржуваат отпорот на колегите од Харвард, нарекувајќи го моментот „крстопат за американските универзитети“. Слично мислење споделија и претставници на универзитетите Стенфорд и МИТ, кои исто така одбија да се прилагодат на барањата на Белата куќа. Претседателот на Харвард, Алан Гарбер, јасно порача дека ниту една влада – без разлика на партиската припадност – не смее да одредува што ќе се предава, кој ќе се прима и вработува на универзитетите.

Од друга страна, администрацијата на Трамп не покажува знаци на отстапување. Покрај замрзнувањето на средствата, претседателот Трамп дури се закани и со одземање на даночниот статус на Харвард – повластена позиција што ја имаат повеќето универзитети и непрофитни организации.

За разлика од Харвард, Универзитетот Колумбија прифати дел од барањата на администрацијата. Овој конфликт ја отвора пошироката дебата за тоа до каде може да оди владата во контролата на автономијата на високото образование – прашање кое допира до самите темели на демократското општество.