Од пад во пресврт – Берзите оживеаја по „царинската бомба“

Изминатата трговска недела донесе најголем седмичен раст на Волстрит од ноември 2023 година. Сепак, само со оваа бројка не може да се опишат сите турбулентни случувања на финансиските пазари.

Индексот S&P 500, кој на почетокот на неделата беше во пад, на крајот оствари раст од 5,7 отсто. Насдак, индексот на технолошките акции, забележа уште поголеми осцилации и ја заврши неделата со добивка од 7,3 отсто.

Главна тема што ги диктираше движењата беше трговската политика на САД, откако претседателот Трамп најави нови царини, па потоа и нивна привремена суспензија.

Паника и пресврт

Во почетокот на неделата, индексот S&P 500 падна во т.н. „bear market“ — ситуација кога вредноста се намалува за повеќе од 20% од претходниот максимум. Распродажбата се прошири и на пазарот на обврзници – приносот на 10-годишните американски обврзници порасна од 4% на 4,5%, а на 30-годишните од 4,42% на 4,88%.

Ситуацијата се смени во среда, кога Трамп објави 90-дневна пауза за новите реципрочни царини. S&P 500 порасна речиси 10% во еден ден – најголем дневен скок од 2008 година.

Царините беа намалени за најголемиот дел од трговските партнери на САД, освен за Кина, на која ѝ беа зголемени до 145%. Кина возврати со свои мерки, со царини до 125% на американска стока.

Сигнали за олеснување – но привремени

Во петокот администрацијата најави дека мобилните телефони, електронските уреди и чиповите ќе бидат изземени од новите царини – што беше добра вест за компании како Apple. Но, во текот на викендот, американски функционери изјавија дека олеснувањето е само привремено додека не се донесат секторски царини за технолошките производи.

Неделата донесе и податоци за инфлацијата, кои останаа речиси незабележани. Потрошувачките цени паднаа за 0,1% месечно, а годишниот раст изнесуваше 2,4% – под очекуваните 2,6%. Основната инфлација исто така беше под прогнозираните вредности, па ова е првпат по четири години таа да падне под 3%.

Почна и сезоната на корпоративни извештаи. Американските банки, кои традиционално први објавуваат резултати, ги надминаа очекувањата. Се предвидува раст на профитот од 5,8% за компаниите од индексот – седми последователен квартал со позитивен тренд. Но, инвеститорските очекувања опаѓаат веќе три месеци по ред, а истото важи и за прогнозите за целата 2025 година.

Добитник на неделата: JPMorgan

Акциите на JPMorgan пораснаа 4% во петокот, а на седмично ниво за повеќе од 12%. Иако резултатите беа добри, банката предупреди на 50% шанса за рецесија годинава и значително ги зголеми резервите за очекувани кредитни загуби – од 1,9 на 3,3 милијарди долари.

Губитник на неделата: Foot Locker

Акциите на малопродажниот синџир Foot Locker паднаа дополнителни 6,6% и достигнаа 11,8 долари – најниско ниво од светската економска криза. Компанијата веќе спроведува реструктурирање, но се соочува со нови ризици поради можни високи царини на спортска опрема.