Осуденичката Криста Пајк е пуштена од болница по неуспешниот обид за егзекуција

Американската осуденица на смрт, Криста Пајк, е пуштена од болница по неуспешниот обид за егзекуција кон крајот на минатиот месец, соопштија нејзините адвокати.

Педесетгодишната убијка е вратена во затворот каде што ги поминала последните 30 години, според соопштението на нејзините адвокати објавено во саботата, јавува Би-Би-Си .

Таа продолжува да добива медицинска нега во затворот.

Пајк преживеа две смртоносни инјекции со пентобарбитал на 30 септември, поради што беше во критична состојба.

Порано оваа недела, таа се освести и почна да зборува, воодушевувајќи ги експертите, медицинскиот персонал и нејзините адвокати.

Со денови, нејзиниот правен тим веруваше дека е мозочно мртва и очекуваше дека во секој момент ќе биде исклучена од апаратите за одржување во живот.

Таа конечно се разбуди и повторно почна да зборува во вторник. Нејзиниот адвокат, Ренди Спајви, рече дека нејзините први зборови биле:

„Каде сум јас?“ и „Кој си ти?“

На прес-конференција во среда, нејзините адвокати рекоа дека таа била врзана со лисици за креветот, страдала од пневмонија, рацете ѝ биле значително отечени и не можела да голта.

„Не знаеме какво влијание ќе има ова“ врз нејзиното ментално здравје, рече Спајви во тоа време, истакнувајќи дека се чувствувала „лута и збунета“.

Не е јасно каква медицинска нега добива Пајк по враќањето во затвор, но нејзините адвокати претходно изјавија дека таа има „долг пат до закрепнување“ пред себе.