Папата Франциск се појави во јавноста првпат по пет недели

Папата Франциск го имаше своето прво јавно појавување по повеќе од пет недели, мавтајќи со раката од балконот во болницата Гемели во Рим пред да ја напушти установата.

Франциск (88) беше примен  во болница на 14 февруари со тешка респираторна инфекција која стана најсериозната здравствена криза во неговото 12-годишно папство.

Лекарите на папата во саботата рекоа дека ќе биде потребно уште „многу време“ за целосно заздравување и рекоа дека му препишале на понтифот уште два месеци одмор во Ватикан.

Франциск се појави на балконот во болницата нешто по пладне во неделата. Користејќи инвалидска количка, папата се насмевна и им мавна на групата добронамерници собрани надвор долу.

Папата, чие лице изгледаше отечено, се појави само на неколку моменти. Тој зборуваше кратко, со слаб глас, за да му се заблагодари на еден од членовите на толпата долу, кој донесе жолти цветови.

Франциск беше виден од јавноста само еднаш претходно за време на неговиот престој во болница, на фотографијата што Ватикан ја објави минатата недела, на која се гледа понтифот на молитва во болничката капела.

Во моментите пред појавувањето на понтифот во неделата, толпата од стотици добронамерници се собраа пред болницата очекувајќи го папата.