Папата Франциск во болница – ги откажа сите настани во следните три дена

Папата Франциск ги откажа сите предвидени активности во наредните три дена откако денес беше хоспитализиран, соопшти Ватикан.

Поглаварот на Римокатоличката црква, кој боледува од бронхитис, требаше да одржи аудиенција во сабота и миса во недела, а во понеделник беше планирана негова посета на римските филмски студија „Синечита“, пренесува „Ројтерс“.

„По завршувањето на денешните аудиенции, папата Франциск беше примен во болница за неопходни тестови и продолжување на лекувањето на бронхитисот во болнички услови“, соопшти Ватикан.

Во последните години, 88-годишниот папа се соочуваше со здравствени проблеми, вклучително грип и настинки. На почетокот на месецов, за време на аудиенција, тој изјави дека има „силна настинка“, која Ватикан подоцна ја потврди како бронхитис.