Пет клучни откритија од воениот план на администрацијата на Трамп: Новинар по грешка вклучен во групен чет

Откритието дека високи американски безбедносни функционери по грешка споделиле воени планови со новинар преку апликацијата Signal предизвика шок во Вашингтон – дури и пред јавноста да дознае што точно содржат тие пораки.

Размената на пораки ја организирал советникот за национална безбедност Мајк Волц, кој по грешка го вклучил Џефри Голдберг, главен уредник на списанието The Atlantic. Во пораките се откриваат размислувањата на администрацијата на Доналд Трамп за можен напад врз хутите – вооружена група во Јемен која напаѓаше трговски бродови во Црвеното Море.

Но, комуникацијата открива и длабоки несогласувања во најтесниот круг на Трамп, како и непромислено ракување со доверливи информации. Ова се петте најважни откритија, според Politico:

1. Потпретседателот Џеј Ди Венс се спротивставил на нападот врз хутите

Потпретседателот на САД изразил сомнеж во оправданоста на воздушни напади врз хутите, кои имаат поддршка од Иран. Тој предупредил дека нападот би бил грешка, нагласувајќи дека Европа многу повеќе зависи од трговијата преку Црвеното Море отколку САД.

„Правиме грешка. Само три проценти од американската трговија поминува низ Суецкиот канал, додека кај Европа тој процент е 40%“, истакнал Венс, додавајќи дека постои реален ризик јавноста да не ја прифати таквата акција.

2.Венс сметал дека Трамп не ја разбира ситуацијата

Според пораките, Венс се посомневал дека претседателот Трамп воопшто ја сфаќа важноста на можниот напад врз хутите и последиците што би ги имал, особено во односите со Европа.

Тој предупредил дека нападите би можеле да доведат до пораст на цената на нафтата и предложил одложување на акцијата за еден месец за подобра процена на состојбата.

3. Лесно ракување со доверливи информации

Во групниот чет, директорот на ЦИА, Џон Ретклиф (или некој од неговиот тим), споделил податоци што новинарот Голдберг одбил да објави, бидејќи можеле да се поврзат со тековни разузнавачки операции.

Исто така, министерот за одбрана Пит Хегсет открил оперативни детали за планираните удари врз Јемен, вклучувајќи цели, вид на оружје и редослед на нападите.

4.Администрацијата со негативен став кон Европа

Од пораките станува јасно дека највисоките функционери во администрацијата на Трамп имаат сериозни резерви кон европските сојузници. Венс во една од пораките напишал:

„Мразам што пак мора да ѝ помагаме на Европа.“

Министерот за одбрана Хегсет се согласил, одговарајќи:

„Целосно го делам твојот презир кон европското потпирање на нас. Тоа е патетично.“

Но, во пораките не е споменато дека Велика Британија активно учествува во поддршката на американските мисии во Јемен, како и дека Франција и НАТО-сојузниците имаат свои воени бродови во Црвеното Море кои пресретнуваат дронови и ракети на хутите.

5. Војна со емоџи

Размената на пораки открива изненадувачки неформален тон во дискусиите за воени операции. По првичните успешни воздушни напади, советникот за национална безбедност Мајк Волц испратил низа емоџи: тупаница, американско знаме и оган.

Државниот секретар Марко Рубио и шефицата на кабинетот на Белата куќа, Сузи Вајлс, испратиле пораки со одобрување, а специјалниот пратеник за Блискиот Исток, Стив Виткоф, додал уште неколку емоџи, вклучувајќи раце во молитва, напрегнат бицепс и американски знамиња. Дури и потпретседателот Венс одговорил со порака:

„Ќе се молам за победа,“ придружена со неколку молитвени емоџи.