Skip to content
Огромен шумски пожар веќе петти ден беснее во јужниот регион Од, што претставува најголем пожар во Франција од 1949 година. Површина од над 16.000 хектари е опожарена, а пожарот одзеде најмалку еден живот, повреди 19 пожарникари и шест цивили.
Локалниот началник на противпожарната служба, Кристоф Мањи, изјави дека пожарот е локализиран, но сè уште не е ставен под целосна контрола и се очекува да остане активен барем до недела навечер.
Сите локални патишта во регионот, кој граничи со Шпанија, повторно се отворени, но влезот во самата пожарна зона е забранет поради опасност од повторно палење.
Француските власти ги поврзуваат пожари со климатските промени, а дополнително влијание имало и тоа што многу лозја во областа биле ископани поради намалена побарувачка на вино и ниски субвенции, иако лозјата вообичаено делуваат како природен противпожарен штит поради задржување на влагата.
Францускиот премиер Франсоа Бајру посочи дека каде што постоеле лозја, пожарот бил во голема мера локализиран, додека други делови од шумата изгореле.
Според Европската комисија, од почетокот на годината во Европа се опожарени над 353 илјади хектари во повеќе од 1.400 пожари.
Воедно, службата за климатски промени „Коперник“ на Европската Унија соопшти дека јули 2025 година бил трет најтопол јули измерен на глобално ниво, со рекордно висока температура од 50,5 степени Целзиусови забележана во Турција.
