По воведувањето царини, Канаѓаните ги откажаа патувањата и не купуваат американски производи

Канаѓаните ги откажаа патувањата јужно од границата, го бојкотираат американскиот алкохол и другите производи, па дури и ја свиркаат американската химна на спортски натпревари, откако американскиот претседател Доналд Трамп во саботата објави царини од 25 отсто за повеќето стоки од Канада.

Иако Трамп вети дека ќе воведе царини за Канада и Мексико пред да стапи на должност, перципираниот чин на економска војна врз земја која е толку блиску до САД – културно и географски, сепак беше шок за многу Канаѓани.

„Се чувствува како Трамп да сака да го реструктуира светскиот поредок“, рече во интервју Дру Дилкенс, градоначалник на канадскиот пограничен град Виндзор. „Тој е подготвен да започне трговска војна со својот најблизок сојузник… Ако е подготвен да го направи ова со Канада, што е подготвен да им направи на сите други?“

Дикенс рече дека околу 400 милиони канадски долари (272 милиони американски долари) трговска размена поминува секој ден преку мостот Амбасадор што ги поврзува Детроит и Виндзор. За неговата заедница од 240.000 луѓе, последиците од царините на Трамп ќе се почувствуваат веднаш. Тој се надева дека жителите ќе ги поддржат локалните винарии и дестилерии.

Жител на Калгари, Кен Лима-Коељо, рече дека вестите за царините поттикнале наплив на канадска гордост во неговото домаќинство. Неговиот 19-годишен син сега прави планови да сошие мало канадско знаме на својот ранец за претстојното патување во Европа, додека неговата ќерка ја поминала саботата вечерта правејќи попис на канадски прехранбени производи во семејната кујна.

„Не можам да направам ништо за ова мочуриште во кое сега се наоѓаме политички со режимот од соседството“, рече Лима-Коељо. „Но, можам да ја сменам пастата за заби што ќе ја купам… и тоа ни дава нешто да направиме додека се надеваме дека нашите политички и деловни лидери ќе го средат ова“.

Трамп воведе увозна царина од 25 отсто за сите канадски стоки, освен за енергетските производи, кои ќе имаат царина од 10 отсто при влез во САД.

Канадскиот премиер Џастин Трудо веднаш објави одмазднички тарифи за 155 милијарди канадски долари (107 милијарди долари) на американска стока. Оние од 30 милијарди канадски долари ќе стапат на сила во вторник, истиот ден како и повеќето тарифи на Трамп, а давачките за преостанатите 125 милијарди канадски долари за 21 ден, рече Трудо.

Трудо, исто така, ги охрабри Канаѓаните да купуваат локални производи и да патуваат во Канада, чувство што го прифатија многу локални службеници.