Почина најстарата личност во светот, Јапонката Томико Итоока

Јапонката Томико Итоока, која беше призната како најстарата личност во светот според Гинисовата книга на рекорди, почина на 116 години, соопштија градските власти во Ашија.

Итоока починала на 29 декември во дом за нега во Ашија, во префектурата Хјого, централна Јапонија, изјави Јошицугу Нагата, службеник за политики за стари лица.

Родена на 23 мај 1908 година во Осака, Томико го прослави својот 116-ти роденден минатиот мај, кога доби цвеќе, торта и честитка од градоначалникот. И покрај нејзините години, останала позната по својот весел дух.

Итоока се омажила на 20 години и имала четири деца – две ќерки и два сина. За време на Втората светска војна, го водела канцеларијата на текстилната фабрика на нејзиниот сопруг. По неговата смрт во 1979 година, живеела сама во Нара.

Позната по љубовта кон бананите и јапонскиот јогуртски пијалок калпис, Томико стана најстарата личност во светот минатата година, по смртта на 117-годишната Марија Брањас, според Геронтолошката истражувачка група.

На веста дека е најстарата личност на светот, Томико скромно одговорила: „Ви благодарам“.

Зад себе остави син, ќерка и пет внуци.

Сега, титулата за најстара личност ја презема 116-годишната бразилска калуѓерка Ина Канабаро Лукас, која е родена 16 дена по Томико Итоока.