Почнаа разговорите помеѓу украинските и американските претставници во Саудска Арабија

Украинските и американските официјални лица започнаа разговори за предлозите за заштита на енергетските капацитети и критичната инфраструктура, рече министерот за одбрана на Украина, дел од дипломатскиот притисок на американскиот претседател Доналд Трамп да стави крај на тригодишната војна.

Состанокот во Саудиска Арабија, кој претходи на разговорите утре меѓу делегациите на САД и Русија, се случува во период кога специјалниот пратеник на САД Стив Виткоф изрази оптимизам за шансите за ставање крај на најсмртоносниот конфликт во Европа по Втората светска војна.

„Чувствувам дека рускиот претседател Владимир Путин сака мир“, изјави Виткоф за Фокс њуз во неделата.

„Мислам дека во понеделник во Саудиска Арабија ќе видите вистински напредок, особено бидејќи тоа влијае на прекинот на огнот на Црното Море на бродовите меѓу двете земји.“

Исто така, советникот за национална безбедност на Белата куќа, Мајк Волц, во неделата рече дека САД разговараат за низа мерки за градење доверба со цел да се стави крај на војната, вклучително и за иднината на украинските деца однесени во Русија.

Најавувајќи го почетокот на преговорите во Ријад, министерот за одбрана на Украина Рустем Умеров, кој ја предводи делегацијата на неговата земја, на Фејсбук објави: „Ја спроведуваме директивата на претседателот на Украина за приближување на праведен мир и зајакнување на безбедноста“.

Путин минатата недела се согласи со предлогот на Трамп Русија и Украина да престанат со нападите меѓусебно врз енергетската инфраструктура на 30 дена, но тој тесно дефиниран прекин на огнот набрзо беше ставен под сомнеж, при што двете страни пријавија континуирани напади.

Во голем напад со руски дронови врз Киев во текот на ноќта загинаа најмалку три лица, меѓу кои и едно 5-годишно дете, предизвикувајќи пожари во високи станбени згради и штети низ главниот град, соопштија во неделата украинските власти.

Во меѓувреме, руските власти во неделата соопштија дека нивната противвоздушна одбрана уништила 59 украински беспилотни летала насочени кон југозападните региони на земјата, додавајќи дека во нападите загинало едно лице во Ростов.