Полицијата сè уште не го знае идентитетот на напаѓачот од Универзитетот Браун

Напаѓачот кој уби двајца студенти на Универзитетот Браун и понатаму е во бегство, а властите сè уште немаат навестувања дека се блиску до негово идентификување, четири дена откако тој отвори оган во училница и побегна низ околните улици во Провиденс, во американската сојузна држава Род Ајленд.

Иако вакви случаи се ретки, се случува сторители на високопрофилни напади да избегнат апсење со денови. „Ова не е вообичаено“, изјави Фелипе Родригез, поранешен њујоршки детектив кој денес предава на Универзитетот Џон Џеј колеџ за кривична правда во Њујорк. „Масовните напаѓачи најчесто се убиени на самото место или брзо се приведуваат.“

Истражителите објавија видео-снимки, главно од камери поставени на влезовите на приватни домови, на кои се гледа лице за кое се верува дека е можниот напаѓач, како се движи низ населбата во близина на кампусот пред, но и веднаш по нападот. На една од снимките се гледа како лицето се оддалечува од зградата веднаш по пукањето, додека полицијата пристигнува на местото на настанот.

Иако мажот на видеата е маскиран, надлежните се надеваат дека некој би можел да го препознае по телесната градба, начинот на одење, движењата или држењето.

„Откако ќе утврдиме за кого станува збор, верувам дека ќе успееме да го лоцираме“, изјави главниот државен обвинител на Род Ајленд, Питер Нерона, на прес-конференција во вторникот. „Многу е тешко да се скриеш во оваа земја.“

Мотивот за нападот засега останува непознат. Според Нерона, камерите во поновиот дел од зградата го снимиле хаосот што настанал по пукањето, но нема ниту една видео-снимка на самиот напаѓач.

Зградата во која се случил нападот се наоѓа на работ на кампусот, што му овозможило на осомничениот брзо да избега кон станбената населба Колеџ Хил, каде што има многу малку безбедносни камери.

Во објава на социјалните мрежи во средата, претседателот Доналд Трамп го критикуваше Универзитетот Браун поради недоволниот број камери, оценувајќи дека за тоа „не може да има изговор“.

Нерона нагласи дека истражителите во моментов имаат „нула“ докази поврзани со мотивот за нападот.