Поранешниот австриски канцелар Себастијан Курц ослободен од обвиненија за лажно сведочење

Поранешниот австриски канцелар Себастијан Курц беше ослободен денес од обвиненијата за давање лажно сведочење во контекст на аферата „Ибица“, по пресудата на Вишиот покраински суд во Виена.

„Изјавите на поранешниот канцелар пред истражниот комитет не можат да се окарактеризираат како лажни“, изјави судија на судот. Со ова беше поништена пресудата на Виенскиот регионален суд, кој во февруари 2024 година го осуди Курц на осум месеци условна казна затвор за давање лажно сведочење. Одлуката на Вишиот покраински суд е конечна и не подлежи на понатамошни жалби.

Обвинението против Курц се однесуваше на неговата улога во пополнувањето на местата во одборот на државната холдинг компанија ÖBAG, која беше поврзана со аферата „Ибица“, во која главна улога имаа политичари од Слободната партија на Австрија (ФПО). Курц беше обвинет за тоа што намерно ја минимизирал својата улога во тој процес.

Поддршка од партијата

Курц, кој се повлече од сите свои политички и партиски позиции по аферата, поднесе жалба на пресудата, тврдејќи дека судот не утврдил дека неговите изјави биле лажни, туку дека биле „недоволно детални“, што, според него, не е доволно за да се донесе пресуда за лажно сведочење.

Австриската народна партија (ÖVP), во која Курц е член, ја поздрави одлуката на судот. Генералниот секретар на партијата, Нико Маркети, изјави: „Секогаш сме биле убедени во невиноста на Себастијан Курц и добро е што судот конечно ја потврди оваа позиција.“

Аферата „Ибица“ и новата кариера на Курц

Аферата „Ибица“ избувна кога беше откриено дека водечките членови на Слободната партија на Австрија (ФПО) се обиделе да поткупат наводни руски олигарси, што доведе до пад на владата на тогашниот канцелар Курц, кој имаше само 31 година во тоа време.

По напуштањето на политиката, Курц се посвети на приватниот сектор и стана претприемач во ИТ индустријата. Во моментов, тој е под истрага за можно кривично дело, поврзано со наводна манипулација со резултатите од анкети на јавното мислење, кои наводно биле манипулирани во корист на неговата партија.