Повеќе од 3.000 луѓе загинаа во Мјанмар, прогласено е примирје во граѓанската војна

Владејачката хунта во Мјанмар денеска прогласи привремен прекин на огнот во граѓанската војна за да ги олесни напорите за помош по земјотресот со јачина од 7,7 степени според Рихтеровата скала во кој загинаа повеќе од 3.000 луѓе.

Соопштението на високата воена команда е објавено денеска на државната телевизија МРТВ во кое се наведува дека прекинот на огнот ќе трае до 22 април, а целта е да се изрази сочувство за луѓето погодени од земјотресот.

Претходно, унилатерален прекин на огнот беше прогласен од страна на вооружените групи на отпор кои се противат на воената власт.

Тие групи мора да се воздржат од напад на државата или прегрупирање, во спротивно војската ќе ги преземе „неопходните“ мерки, се вели во соопштението на војската.

Претходно денеска спасувачите извлекоа живи тројца мажи од урнатините пет дена по земјотресот. Сепак, тимовите најчесто извлекуваат мртви тела.

Земјотресот со епицентар во Мјанмар е силно почувствуван и во Тајланд, а причинета е голема материјална штета. Бројот на жртвите денеска се искачи на 3.003, а повредени се над 4.500 лица, објави МРТВ. Се претпоставува дека бројките се многу поголеми.

Во Мјанмар веќе имаше хуманитарна криза поради граѓанската војна. Повеќе од три милиони луѓе се внатрешно раселени, а на повеќе од 20 милиони луѓе им беше потребна помош дури и пред земјотресот, според Обединетите нации.