Продолжуваат маратонските разговори меѓу САД и Русија и по девет часа преговори

Претставниците на САД и Русија продолжија со преговорите во Ријад повеќе од девет часа, пренесуваат агенциите. Средбата трипати беше прекинувана, но неочекувано продолжи и по планираниот крај.

Разговорите, кои се одржуваат зад затворени врати во хотелот „Риц Карлтон“, имаат цел да дојдат до договор за ограничен прекин на огнот во Украина, со фокус на запирање на нападите врз енергетската инфраструктура.

Вашингтон, исто така, врши притисок за продолжување на прекинот на огнот на бродските рути во Црното Море.

Руската делегација ја предводат дипломатот Григориј Карасин и разузнавачот Сергеј Беседа, додека американската делегација ја сочинуваат специјалниот пратеник Кит Келог, советникот за национална безбедност Мајк Волц и други високи претставници.

Според саудиски медиуми, украинскиот министер за одбрана Рустем Умеров, исто така, пристигнал на нова рунда разговори.