Skip to content
Мистериозни трепкачки светла на небото предизвикаа тревога низ Германија во вторникот вечерта, а властите потврдија дека причината е ракета што ја користела американската вселенска компанија SpaceX, јави ДПА.
Германската команда за вселенски компоненти, огранок на германските воздухопловни сили, во средата соопшти дека нема докази дека остатоци паднале над Германија.
Светлата се предизвикани поради повторното влегување на делови од ракетата Falcon 9 на SpaceX во атмосферата на Земјата, изјави портпаролот на командата.
Ракетата беше лансирана од САД на 1 февруари.
Бројни жители ја повикале германската полиција да пријават необични светла на небото нешто по полноќ.
Германската агенција за известување за НЛО, ЦЕНАП, соопшти дека рано во средата снимила околу 120 повици.
Еден човек од Лихтенфелс во западната покраина Хесе изјави за радио станицата hr3 дека ја ѓубрeл својата нива кога ги видел светлата.
„Нешто се распадна, имаше блескави ленти во бела, црвена и портокалова боја, а потоа полека исчезна во хоризонтот. Беше некако феноменално“, рече тој. „Повеќе личеше на научно-фантастичен филм – како да слетуваат вонземјани.
SpaceX, основан од милијардерот Илон Маск, изврши неколку лансирања од Флорида за својот сателитски интернет провајдер Starlink во последните неколку недели, вклучително и во вторникот вечерта.
Додека првата фаза од ракетата може повторно да се употребува, втората фаза гори кога повторно ќе влезе во атмосферата, понекогаш неколку недели по лансирањето.
Портпаролот на вселенската команда рече дека ракетите можат да изгорат на небото низ планетата, а делот што предизвика тревога во вторникот вечерта повторно влезе во атмосферата некаде над Велика Британија или Северна Ирска.
