Skip to content
Партиите вклучени во разговорите за формирање на новата германска влада размислуваат за брзо формирање на два специјални фонда, потенцијално во вредност од стотици милијарди евра, еден за одбрана и втор за инфраструктура, пишува Ројтерс повикувајќи се на три извори за кои се вели дека се запознаени со разговорите на овие теми.
Економистите кои ги советуваат партиите кои најверојатно ќе формираат нова владина коалиција проценуваат дека се потребни околу 400 милијарди евра за одбранбениот фонд и 400 до 500 милијарди евра за инфраструктурниот фонд, велат изворите за Ројтерс.
Вжештената средба во Белата куќа во петокот меѓу украинскиот претседател Володимир Зеленски и американскиот претседател Доналд Трамп го зголеми чувството на итност во Берлин да се дејствува побрзо за трошоците за сопствената одбрана на Германија и за Украина, рекоа тие.
Високи личности од германските конзервативци и социјалдемократите во петокот започнаа разговори за формирање коалициска влада со надеж дека Фридрих Мерц, лидерот на конзервативниот блок кој беше прв на изборите минатата недела, ќе формира влада до Велигден.
Но, надежта е дека средствата ќе бидат одобрени во март за време на сегашниот парламент пред да се формира нова влада, велат луѓето.
За двата специјални фонда разговараат три партии – Христијанско-демократската (ЦДУ), баварската Христијанско-социјална унија (ЦСУ) и Социјалдемократите (СПД) на канцеларот Олаф Шолц – и тие работат на детали, велат луѓето под услов да останат анонимни.
Се уште не се донесени конечни одлуки, додаваат оттаму.
Партиите одбија да коментираат, повикувајќи се на доверливост на разговорите.
